Följande information presenteras på romani arli.

Šukar aljan ki Kulturanalys!

– i institucija e kulturno-političko istražibase hem analizače

Kulturanalys (E Kulturaki analiza) tani jekh državno institucija koja isila o zadatko te ocenini, analizirini hem te del palune izveštajija ando efektija ando predlogija hem ando čerde mere ko kulturake politička oblastija ki Švedska. Odova valjani te čerel pe hem obavezno te ljel pe ko obzir o ciljija andi nacionalno kulturake politika. Kulturanalys isila hem o zadatko te pomožini e Vladače adžahar so ka del informacije hem preporuke kola ka pomožinen e državno kulturake politika te razvijini pe. E Kulturanalys-aki buti tani te čerel pošukar uslovija okoljendže kola tane aktivna ki kulturako sektor.

O manuša kola čerena buti ki Kulturanalys, čerena buti e statistika, istražinena hem analizirinena, ama hem čerena buti e administracija hem komunikacija. Amare istraživačija isiljen baro, kvalifikujimo bučako iskustvo ki istražno buti, a disave ando oljende isiljen bare fakultetska titule, sar doktorija hem bavinena pe razna akademska istražiba. E institucijako šefi tano o Mats Granér.

I Kulturanalys tano jekh jednoglasno autoriteti, a odova značini so e institucijako šefi, jekh manuš, tano odgovorno sar čerela pe i buti, za razliku ando odbor ja andi komisija. I Vlada imenuija jekh grupa ando manuša/savet koja isila sar cilj sa te ovel javno transparentno, sar čerela pe buti hem isiljen buti te den savetija e glavno šefese. E institucijako šefi tano predsednik ano odova savet hem obavestini o savet ando buča ki Kulturanalys.

So čera amen

Odova so amen tromal te čera tane instrukcije kola tane pisime ko institucijako pravilnik. Ko odola dokumentija, kola odredinena sar hem so čerela pe, i Vlada pisija save očekivanja isila andi Kulturanalys hem dela specifična buča kola i insitucija valjani te čerel. Ko amaro plano analizače, amen opisijam sar amen odlučijam te čera amari buti hem sar organizuijam amen.

E bučake područja
I statistika hem e kulturake tabijatija

I Kulturanalys tani odgovorno ko štar područja kola bavinena pe statistika ko zvanično statistikako kulturako oblast: kulturako okružibe (kulturmiljö), muzeija, društvake kulturake troškija hem o film. I Kulturanalys čerela hem statistika ando kulturake tabijatija hem andi scensko umetnost.
Kulturanalys-aki statistika pratini so ovela ko kulturako dživdipe, dela šajipe ko analize hem istražiba hem andi Kulturanalys hem ando avera, te šaj te den pe prava informacije ked čerena pe debate andi kulturaki politika hem ando kulturake polička mere. Amen čhiva amari statistika ko izveštajija hem ko tabele akate ko amaro internetsko than.

Istražiba, analize hem procene ando statusija

I Kulturanalys čerela analize hem istražiba ko kaso fokus tane e državake reforme hem o investirie. Amen čera hem procene ando statusija ki relacija premalo kulturake političja ciljija. Amare procene šaj te mothoven da li šaj isi disave odstupanja ando kulturake politička ciljija ja da lji šaj isi disavo nepovoljno razvijibe ja dijekh situacija kaj nalazini pe jekh specifično grupa ko društvo. Odolje procenencar ando statusija amen šaj te mothova ko kola kulturake politička područja valjani te čeren pe hitna politička promene. Ando amare analize hem procene ando statusija šaj te čitine pobuter ko amare publikacije akate ko amaro internetsko than.

Kulturanalys Norden

Kulturanalys Norden tano jekh džanibaso centro e kulturakake politikače ki Severno Evropa. I Severno Evropako Savet Ministarstva (Nordiska Ministerrådet) osnujija o centar hem ando berš 2016. tano jekh kotor andi Institucija e kulturake analizendže (Myndigheten för kulturanalys). I činjenica soj e Kulturanalys Norden tano jekh severno evropako centar, značini so amen stalno pratina hem analizirina e kulturake politička tendencije ja promene ki Severno Evropa, sar ko primer ki Danska, Finska, Island, Norveška hem ki Švedska hem ko samostalna područja ko Farska ostrva, Grenland hem ko Oland. Amen analizirina razna kulturake pučiba kotar razna perspektive hem kotar razna oljenge statistike. Amare publikacije ando Kulturanalys Norden šaj te čitine akate ko amaro internetsko than.

Kontaktirin amen:

Kontaktirin amen ko info@kulturanalys.se